Дар чанд ҷумла
Ҳалокати се узви як оила аз дуди ангишт дар Тоҷикистон
Бар асари заҳролудшавӣ аз дуди ангишт се нафар дар деҳаи Турушбоғи ҷамоати Хонақоҳи Кӯҳии Ҳисор, канори шаҳри Душанбе, ҷон бохтаанд.
Кумитаи ҳолатҳои фавқулода рӯзи 6-уми март дар эъломияе гуфт, онҳо аъзои як оила ҳастанд.
Ҳодиса шаби 5-уми марти имсол рӯй додааст. Ҷузъиёт дар даст нест.
"Ба наздикони ҷонбохтагон изҳори ҳамдардӣ карда, бори дигар аз мардум даъват менамоем, ки тамоми қоидаҳои бехатариро риоя кунанд. Бухорӣ ва дудбароҳоро тафтиш кунед!" -- гуфта шудааст дар эъломияи Кумита.
Ҳафтаи гузашта аз дуди ангишт шаш узви як оила, аз ҷумла чаҳор кӯдак, ҷон бохтанд.
Онҳо дар маҳаллаи Гравзавод, дар ҳудуди ноҳияи Фирдавсии пойтахт, мезистанд. Ҳодиса дар рӯзҳои сарду бебарқӣ дар Тоҷикистон рӯй дод ва боис ба вокунишҳои зиёд шуд.
Масъулони Кумитаи ҳолатҳои фавқулода гуфтанд, ки Музаффар Давлатови 38-сола ва ҳамсару кӯдаконаш аз дуди ангишт фавтиданд. Наздикони марҳум мегӯянд, онҳо дар тағора чӯб ва резина рӯшан карда будаанд.
Ба гуфтаи ҳамсояҳо, кормандони мақомот дар ҷои ҳодиса буданд, вале натиҷаи таҳқиқи марги аъзои ин хонавода эълон нашудааст.
Бори аввал нест, ки дар рӯзҳои сард сокинон аз дуди ангишт мефавтанд. 8-уми декабри соли 2023 се узви як оила, аз ҷумла як кӯдак дар шаҳри Душанбе бар асари заҳролудшавӣ аз дуди ангишт ҷон бохтанд.
Дар оғози соли гузашта дар ноҳияи Кушониёни вилояти Хатлон як зану шавҳари ҷавон бар асари дуди ангишт дар дохили ҳаммом фавтиданд.
Сокинони Тоҷикистон дар тирамоҳу зимистон барқи доимӣ надоранд ва маҷбуранд барои гарм кардани хона аз ангишт истифода баранд. Аммо ин усули гармкунии хона барои бархе бо қимати ҷонашон тамом мешавад.
Ҳамаи хабарҳои имрӯзро дар инҷо бихонед
Форум 18 мегӯяд, шиамазҳабон дар Самарқанд таъқиб мешаванд
Форум-18, як расонае, ки масоили ҳуқуқи динӣ ва мазҳабиро инъикос мекунад, гуфтааст, ки маъмурони пулиси Узбекистон ҳафтаи гузашта 6 марди шиамазҳабро дар Самарқанд боздошт карда, барои бозпурсӣ бурдаанд.
Дар гузорише, ки Форум 18 рӯзи 8-уми сентябр нашр кардааст, гуфта мешавад, ки маъмурони пулис ва идораи мубориза бо ифротгароӣ субҳи 3-уми сентябр бидуни иҷоза ба хонаи ин шаш нафар ворид шуда, ҷустӯҷу кардаанд ва ҳамаи онҳоро барои бозпурсӣ бурдаанд. Чанде аз сокинони маҳалла ба Форум 18 гуфтаанд, ки ҳамаи ин афрод баъди муддати кутоҳе раҳо шудаанд ва дар байни онҳо се нафаре будаанд, ки моҳи май ҳам барои эътиқоди диниашон боздошт шуда буданд.
Ба навиштаи Форум 18, Бахтиёр Раҳимов ва бародараш Шерзод Раҳимов ва фарди дигаре бо номи Иброҳим Иброҳимов аз ҷумлаи чаҳор нафаре ҳастанд, ки кормандони милиса онҳоро баҳори имсол дастгир ва шиканҷа кардаанд. Онҳоро баъдан барои нофармонӣ ба кормандони давлат ва авбошӣ муттаҳам карда, чанд шабонарӯзӣ ҳабс кардаанд.
Ба гуфтаи Форум 18 аз моҳи май то кунун маъмурони амниятии Узбекистон ба зидди шиамазҳабон дар Самарқанд амалиёт анҷом дода ва аз баъзе аз онҳо пурсидаанд, ки “чаро барои баррасии дин як гурӯҳи чатҳои "ғайриқонунӣ" таъсис додаанд ва чаро бархе аз аъзои ин гурӯҳ дар хориҷа ҳастанд.” Форум 18 аз қавли чанде аз онҳо навиштааст, ки "танҳо мавзӯъҳои мазҳабии марбут ба паёмбар Муҳаммад, имомҳо ва пояҳои мазҳаби шиъаро баррасӣ карданд." Ба қавли мусоҳибони Форум 18, азбаски “имкони расмии омӯзиши мазҳаби шиъа вуҷуд надорад, маркази омӯзишӣ, мактабҳо ва мутахассиси расман эътирофшуда барои таълими мазҳаб вуҷуд надорад, аз ин рӯ одамон гурӯҳи Telegram-ро таъсис доданд."
Ба навиштаи Форум 18, ҷамоатҳои динӣ дар Узбекистон бидуни сабти расмӣ иҷозаи фаъолият надоранд ва иҷрои ойинҳои динӣ ба таври дастаҷамъӣ ғайриқонунӣ аст.” Дар мақола омадааст: “Мақомот ҳамчунин дархости сабти номи ҷамоаҳои мусалмонӣ ба мисли шиъаҳо ва онҳоеро, ки мехоҳанд берун аз муфтиёти таҳти назорати давлат фаъолият кунанд, рад мекунанд.” Форум 18 навиштааст, ки мақомоти Узбекистон ба тақозоҳои батакрори ин созмон барои шарҳи ин қазияҳо ҷавобе надодаанд.
Селу обхезиҳо дар Покистон ҷони 900 нафарро гирифтаанд
Cелу обхезиҳои густарда дар Покистон бори дигар киштзорҳои бузург дар вилояти Панҷоб ва Синдро зери об ва миллионҳо нафарро овора кардаанд. Танҳо дар шаҳри Ҷалолпур дар Панҷоб, маъмурони имдодӣ бо кӯмаки артиш дар рӯзҳои ахир беш аз 122 ҳазор нафарро ба ҷойи амн кӯч додаанд.
Амалиёти шабона рӯзе пас аз он сурат гирифт, ки оби рӯдхонаҳо баъди боронҳои сахти мавсимӣ аз соҳилу садҳо берун омаданд ва рустоҳову киштзорҳоро зери об карданд. Мақомот мегӯянд, аз чанд рӯзи пеш то кунун беш аз 3900 русто дар 26 панҷоб ба зери об мондаанд ва ҳудуди 2.2 миллион нафар ночор хонаҳои худро тарк кардаанд.
Созмони Мудирияти Бӯҳрон дар Покистон эълом кардаст, ки аз оғози борандагиҳои мавсимӣ аз охири моҳи июн то кунун беш аз 900 нафар дар саросари кишвар ҷон бохтаанд . Танҳо дар вилояти Панҷоб 61 нафар дар натиҷаи селу обхезиҳо ҷон додаанд. Мақомоти имдоду наҷот эълом карданд ки дар вилояти қабоилнишини Свот, пас аз туғёни рӯдхонаҳо ва наҳрҳо беш аз 2000 нафарро ба манотиқи амн кӯч додаанд.
Бозмондагони фалокат аз гармои сӯзону камбуди кумакҳои фаврӣ гила доранд. Бисёре дар хаймаҳо, ё канори роҳҳо бидуни ғизову имконоти кофӣ зиндагӣ мекунанд.
Коршиносон мегӯянд, сабаби аслии селобҳо таркиби боришҳои мавсимии сахт бар асари тағйироти иқлим ва сар додани оби обанборҳо аст. Мақомоти Покистон, ки тақрибан ними аҳолии 255 миллион нафариаш дар Панҷоб зиндагӣ мекунанд, гуфтаанд, ки имсол ҳаҷми борандагӣ дар муқоиса ба соли гузашта 73 дарсад бештар будааст.
Дар маҷмуъ селобҳои имсол то кунун ба зиндагии беш аз 4.1 миллион нафар дар 4100 русто дар вилояти Панҷоб таъсири манфӣ гузоштааст. Коршиносон ҳушдор медиҳанд, ки бо идомаи боришҳои мавсимӣ то моҳи сентябр , хатари бадтар шудани бӯҳрон ҳамчунон болост.
Дар ҳамлаи Русия ба маҳаллаи Ярови Украина 20 кас кушта шудаанд
Владимир Зеленский, раиси ҷумҳури Украина гуфтааст, ки дар натиҷаи партоби як бомби русӣ ба як маҳаллаи аҳолинишин дар вилояти Донетск бештар аз 20 нафар кушта шудаанд. Ӯ дар Телеграм навишт, ки ҳамла ба маҳаллаи Яровая рӯзи 8-уми сентябр сурат гирифтааст ва онро «воқеан ваҳшиёна» номид.
Раиси ҷумҳури Украина видеоеро ҳам нашр кардааст, ки дар он ҷасади чанд нафар дар рӯи замин ва моҳинҳои осебдидаву оқибатҳои ҳамла дида мешаванд. Ба қавли Зеленский, дар натиҷаи ҳамла ғайринизомиён кушта шудаанд ва замоне, ки ба онҳо нафақа тақсим мекардаанд.
Вадим Филашкин, раиси вилояти Донетск гуфт, ки дар ҳамла ба Яровая 21 нафар ва ғайринизомиён кушта шудаанд ва амалкарди Русияро «терроризми ошкор» номид. Низомиёни Русия ҳамларо шарҳе надоданд, ҳарчанд маҳаллаи Яровая дар хабарномаи вазорати дифои Русия дар рӯзи 8-уми сентябр зикр шудааст ва дар он омадааст, ки ҳамла ба «нерӯҳо ва техникаи нерӯҳои мусаллаҳи Украина» сурат гирифтааст.
Маҳаллаи Яровая дар шимолу шарқи шаҳри Лиман дар вилояти Донетск ҷойгир аст ва соли 2022 таҳти назорати Русия қарор дошт, вале онро се сол пеш нерӯҳои Украина бозпас гирифтаанд. Як моҳ пештар бо пешравии нерӯҳои Русия, мақомоти Украина ба мардум амр доданд, ки маҳалларо холӣ кунанд, чун чанд километр дуртар аз ҷабҳаи аввали ҷанг қарор гирифтааст.
Назарпурсӣ: Русиягиҳо намехоҳанд, аз паёмрасони Max истифода кунанд
Дар як назарпурсӣ дар Русия, 47 дарсади пурсидашудаҳо гуфтаанд, аз боргирии мессенҷери миллии Маx дар телефонҳояшон худдорӣ мекунанд. 34 дарсад тасмим доштаанд, ин барномаро насб кунанд.
Назарсанҷиро гурӯҳи таҳқиқотии Extreme Scan охири моҳи август дар миёни 1005 нафар гузаронидааст. Аз русиягиҳо дар баробари мессенҷер ё паёмрасони Маx, ҳамчунин дар бораи кори интернет пурсон шудаанд.
79 дарсади пурсидашудаҳо гуфтаанд, дар шаш моҳи охир зимни истифодаи интернет тариқи телефони худ мушкил доранд.
Паёмрасони серистифода ва маъруф дар миёни русиягиҳо WhatsApp – 59%, ва Telegram 35% будааст.
Назарпурсӣ муайян кардааст, ки 28 дарсади пурсидашудаҳо (аксаран корбарони аз 18 то 29 сола) аз қулфшиканҳо ё VPN истифода мебаранд. 56 дарсади онҳое, ки аз ин роҳ ба шабакаҳои иҷтимоӣ ва сомонаҳо ворид мешаванд, ба ин боваранд, ки бастану манъи дастрасӣ ба сомонаҳо ба маънии маҳдуд сохтани озодии шаҳрвандон аст.
Паёмрасони миллии Max дар Русия ҷойгузини замимаи VK Messenger аст, ки аз сӯи ширкати наздик ба давлат сохта шудааст. Он моҳи майи соли равон муаррифӣ ва аз оғози моҳи сентябр насби он дар смартфону планшетҳо ҳатмӣ гардид. Бо оғози тарғиби ин паёмрасон дар Русия мақомот занг задан аз тариқи паёмрасонҳои Вотсап ва Телеграмро маҳдуд карданд. Сабаб мубориза бо қаллобон гуфта шудааст.
Ҷавони тоҷикро ба қатли арӯсшавандаи 19-солааш гумонбар карданд
Вазорати корҳои дохилии Тоҷикистон аз қатли бераҳмонаи як духтаре хабар дод, ки ба дасти ҷавони зоҳиран ошиқи ӯ кушта шудааст.
Дар баёнияи вазорат аз рӯзи 8-уми сентябр омадааст, ки як сокини 20-солаи ноҳияи Зафаробод ба сабаби он ки волидони духтар тақозои хостгории ӯро рад кардаанд, ӯро ба як маҳалле бурда, “бо воситаи корди бо худ доштааш 16 маротиба ба узвҳои ҳаётан муҳимаш зарба задааст.”
Баъди ин ба гуфтаи вазорат “ҷабрдидаро ба дохили бинои сохтмонаш нотамоми деҳаи Логин дароварда, бо бензин оташ зада, ба ҳалокат расонидааст.” Мақомоти интизомӣ гуфтаанд, ки сабаби ин бераҳмӣ нисбат ба духтар, “аз ҳиссиёти рашк” ва посухи рад шунидан аз волидони арӯсшавандааш ҷавондухтари 19-сола” будааст. Ҳодиса рӯзи 5-уми август рух додааст.
Ному насаби ҷавони гумонбар ба одамкуширо нагуфтаанд. Ба ӯ, ки ба одамкушӣ бо бераҳмии хос муттаҳам мешавад, камаш 15 соли зиндон таҳдид мекунад. Назари худи ӯ, ё вакили дифои ҷавон маълум нест.
Чаҳор шаҳрванди Тоҷикистонро аз Мавритания бозгардонидаанд
Мақомоти Тоҷикистон мегӯянд, ки дар нимаи аввали имсол дар ҳамкорӣ бо мақомоти интизомии Туркия чаҳор шаҳрванди кишварро аз дасти қочоқбарони инсон халос карда аз Мавритания ба ватан баргардонидаанд.
Дар як санади расмии ҳукумати Тоҷикистон, дар бораи мубориза бо шиканҷа, ки Радиои Озодӣ онро ҳам дид, омадааст, “Дар ҳамкорӣ бо шарикони худ аз Туркия пеши роҳи гурӯҳе аз гумоштагони як созмони муташаккили қочоқбар гирифта шуд, ки худро мубаллиғони мактабҳои динӣ муаррифӣ карда, ба фиристодани одамон ба Мавритания машғул буданд.” Барои ин кор ду нафарро дастгир кардаанд ва чаҳор шаҳрванди Тоҷикистонро ҳам ба ватан баргардонидаанд.
Маълум нест, афроди боздоштшуда шаҳрвандони кадом кишвар ҳастанд ва бар асоси муқаррароти қонун, номи фиребхӯрдагон ва ҷабрдидагонро нагуфтаанд. Зоҳиран ин афрод аз ҷумлаи хоҳишмандони муҳоҷирати корӣ будаанд, ки дар ин санад омадааст, ба ҳамин сабаб дар байни мардум аз ҷумла муҳоҷирони корӣ, тадобири тарғиботӣ ва ё огаҳсозӣ анҷом андешида мешавад.
Шаҳрвандони Тоҷикистон умдатан дар кишварҳои арабӣ ва ё Русия истисмор мешуданд ва ё ба дасти қочоқбарони инсон меафтоданд, вале бори аввал аст, ки дар бораи аз роҳи фиреб то ба Мавритания, яке аз кишварҳои дурдасти африқоӣ бурдани онҳо гузориш мерасад.
Бо беш аз 100 мошини борбар аз Тоҷикистон ба Афғонистон кӯмак фиристоданд
Тоҷикистон ба сокинони дар пайи заминларза осебдидаи Афғонистон беш аз 100 мошини борбар ёрии башардӯстона ирсол кардааст.
Дар ин бора Шоҳин Самадӣ, сухангӯйи Вазорати корҳои хориҷии Тоҷикистон, рӯзи 8-уми сентябр хабар дод. Вай гуфтааст, иқдоми мазкур “дар доираи тадбирҳои башардӯстона” ва бо супориши раиси ҷумҳур сурат гирифтааст. Бино ба иттилои вазорат корвони мошинҳо бо тақрибан 3000 тонн маводи зарурӣ аз Тоҷикистон ба роҳ баромад.
Кӯмакҳо асосан аз маводи ғизоӣ, либосу хайма, масолеҳи сохтмонӣ, оби нӯшокӣ ва дигар ашёи зарурӣ иборат будааст. Дар шабакаҳои иҷтимоӣ навори ҳаракати мошинҳои борбари ҳомили кӯмакҳо ба Афғонистон нашр шудааст.
Кӯмакҳои башардӯстона дар ҳоле ба Афғонистон интиқол меёбанд, ки вазъи мардум дар ин кишвар баъди заминларзаи харобиовар ва пасларзаҳои он вазнин шудааст. Ба иттилои созмонҳои ҷаҳонӣ, сокинони зарардидаи кишвари ҳамсоя аз ҳар ҷиҳат азият мекашанд.
Зилзилаи шашдараҷаии рӯзи 31 август дар вилоятҳои шарқии Афғонистон, аз ҷумла, Кунар, Нангарҳор ва Лағмон талафоти вазнини ҷонӣ ва молӣ ба бор овард.
Ин ҳодиса яке аз маргбортарин зилзилаҳои солҳои ахир дар Афғонистон гуфта мешавад.
Мақомоти ҳукумати Толибон рӯзи 4 сентябр шумори қурбониёни ин ҳодисаро беш аз 2200 нафар эълон карданд. Такони дуюми замин 2 -уми сентябр ба вуқӯъ пайвста, боиси воҳимаи зиёд ва таваққуфи амалиёти наҷот гардид.
Дар ҳамла дар Байтулмуқаддас 5 нафар кушта шудаанд
Маъмурони тиббӣ дар Исроил мегӯянд, дар натиҷаи тирандозӣ дар як истгоҳи автобус дар шимоли Байтулмуқаддас 5 нафар кушта шудаанд. Дар ҳамла дар наздикии як чорроҳаи серавуо ба гуфтаи мақомот 16 каси дигар захм бардоштаанд ва аҳволи 6 нафари онҳо бисёр ҷиддӣ будааст.
Ба гуфтаи маъмурони пулиси Исроил ҳамлаварон тирандозиро дар истгоҳи автобус оғоз кардаанд, вале матбуоти Исроил мегӯяд, ҳарду ба дохили автобус ҳам ворид шуда, тирандозӣ кардаанд. Як афсари пулис ва шаҳрванди оддӣ ҳамлаваронро бо зарби тир кушта, ба ҳамла хотима додаанд. Пулиси Исроил дар бораи ҳуввияти ҳамлаварон то кунун чизе нагуфтааст.
Ҳамла дар як чорроҳаи серодаме дар даромадгоҳи шимолии Байтулмуқаддас ва дар роҳе рух дод, ки ба самти маҳаллаҳои яҳудинишин дар шарқи Байтулмуқаддас мебарад. Ҳеч як гурӯҳи тундрави фаластиниён дар бораи ҳамла чизе нагуфтааст. Ҷанг дар Ғазза сабаби авҷ гирифтани хушунат дар сарзаминҳои ишғолӣ дар Навори Ғазза ва ҳам худи Исроил шуд.
Тундравони фасластинӣ бо ҳамла ҳам дар қаламрави Исроил ва ҳам Навори Ғазза исроилиҳоро куштанд ва дар тарафи дигар ҳамлаҳо ба фаластиниён ҳам зиёд шуд. Созмони Милал мегӯяд, аз замони оғози ҷанг дар Ғазза то моҳи июли соли 2025 фаластиниён дар Канораи Ғарби Рӯди Урдун 49 исроилиро куштаанд ва дар ҳамин муддат 968 фаластинӣ аз дасти нерӯҳои Исроил ва ғайринизомиён дар худи Исроил ва Канораи Ғарб ба ҳалокат расидаанд.
Паҳлавонони тоҷик дар мусобиқаи бози Осиё 4 медал гирифтанд
Варзишгарони тоҷик дар мусобиқаи бози Осиё-2025 (“Hangzhou Asian Open 2025”) дар риштаи ҷудо, ки рӯзҳои 6-7-уми сентябр дар шаҳри Ҳангжоуи Чин баргузор шуд, чаҳор медал ба даст оварданд.
Ба иттилои Федератсияи байналмилалии ҷудо (IJF), дар ин мусобиқаи қитъавӣ дар Чин 87 варзишгар (52 мард ва 35 зан) аз 3 қора иштирок карданд.
Дар мусобиқаи “Hangzhou Asian Open 2025” ба ғайр аз гуштигирони даҳ кишвари Осиё - Қазоқистон, Кореяи Ҷанубӣ, Макао, Муғулистон, Тайланд, Тайпейи Чин, Тоҷикистон, Узбекистон, Ҳонконг ва Чин, инчунин намояндагони Австралия, Канада, Зеландияи Нав ширкат доштанд.
Тоҷикистонро дар мусобиқаи бози Осиё-2025 дар Ҳангжоу шаш паҳлавони ҷавон дар сабқати мардон муаррифӣ карда, чаҳор нафарашон соҳиби медал шуданд.
Абдулло Қуқаншоев дар вазни то 60 кило, Набии Нуралӣ дар вазни то 66 кило, Илҳомиддин Ҷабборов дар вазни то 73 кило ва Саидмуъмин Шарифзод дар вазни то 81 кило бо медалҳои биринҷӣ сарфароз гаштанд.
Муҳаммадраҳим Сарахонов дар вазни то 81 кило мақоми панҷумро касб кард.
Дар ҳисоби медалҳо мунтахаби Чин бо касби 22 нишон (9 тилло, 6 нуқра ва 7 биринҷӣ) ҷойи аввалро соҳиб шуд. Мунтахаби Австралия бо касби 8 медал (2 тилло, 4 нуқра ва 2 биринҷӣ) ҷойи дуюм ва мунтахаби Қазоқистон бо касби 4 медал (1 тилло, 2 нуқра ва 1 биринҷӣ) ҷойи сеюмро азони худ карданд.
Тоҷикистон бо касби 4 медали биринҷӣ ва як ҷойи панҷум дар байни 13 даста ҳафтум шуд.
Изҳори омодагии Трамп ба оғози таҳримҳои нав алайҳи Русия
Раиси ҷумҳури Амрико, Доналд Трамп дар сӯҳбат бо хабарнигорон ба оғози “марҳилаи дуввум”-и таҳримҳо алайҳи Русия, дар пайванд ба ҷанги Украина изҳори омодагӣ кард.
Вай ин масъаларо зиёд тавзеҳ надод. Аммо қаблан президенти Амрико гуфта буд, ки дар сурати ба даст наомадани пешравӣ дар музокироти сулҳ дар Украина, алайҳи Русия таҳримҳои нав ҷорӣ мекунад.
Пас аз аз мулоқот бо президенти Русия, Владимир Путин дар Аляска рӯзи 15-уми сентябр, Трамп гуфта буд, ки ду ҳафта мунтазири мавқеи Маскав мемонад ва баъд тасмим хоҳад гирифт.
Шаби 7-уми сентябр Русия бо истифодаи садҳо бесарнишин ба Украина ҳамла кард. Дар натиҷа чаҳор нафар кушта шуда, ба бинои ҳукуматӣ дар маркази Киев зарар расидааст. Раҳбарони бархе аз кишварҳои ғарбӣ, ин амалро як нишонаи дигаре барои омода набудани Русия ба сулҳ номидаанд.
Вазири молияи ИМА, Скотт Бессент пештар дар сӯҳбаташ бо NBC News изҳор дошт, ки Амрико ба “идомаи фишорҳо алайҳи Русия” омода аст, вале қарор аст ин ҳамзамон бо амалҳои дигар шарикони ИМА сурат бигирад.
Вазири молияи Амрико ҳушдор додааст, ки ҷорӣ шудани таҳримҳои иловагии навбатӣ алайҳи кишварҳое, ки ба харидории анфти Русия идома медиҳанд, метавонад ба иқтисоди Русияро зарба занад.
“Ҳоло мо дар як сабқати ширкат дорем, ки бояд дар он нишон дода шавад, артиши Украина то кай муқовимат ва иқтисоди Русия то куҷо тобовар хоҳадбуд.” - афзуд, вай ва илова кард, ки “Агар ИМА ва Иттиҳоди Аврупо дахолат карда, ба кишварҳои харидори нафти Русия таҳрим ва боҷи иловагӣ ҷорӣ кунанд, иқтисоди Русия пурра касод хоҳад шуд ва ин президент Путинро водор мекунад, ки сари мизи музокирот нишинад.”
Аз оғози кори маъмурияти нави ИМА алайҳи Русия таҳриме ҷорӣ нашуда буд. Дар айни замон таҳримҳои қаблан ҷорӣ шуда ҳам аз байн бурда нашудаанд.
Ҳамлаи сагҳои дайду ба 17 нафар дар Ҳисор
Дар пайи ҳамлаи сагҳои оворагард дар деҳаи Гулхании шаҳри Ҳисор 17 нафар осеб дида, ба беморхона интиқол ёфтаанд.
Ҳодиса бегоҳи рӯзи ҷумъа, 5-уми сентябр рух додааст. Илҳом Қараев, сардухтури беморхонаи ин шаҳр дар як тамоси телефонӣ ба Радиои Озодӣ ҳодисаро тасдиқ кард ва гуфт, аксарият аз рӯй ва даст зарар дидаанд. Беморон ҳама дар як рӯз муроҷиат кардаанд.
Ҳоло ба гуфтаи вай 6 нафар, ки аксарият наврасонанд дар беморхона бистариянд ва ба дигарон пас аз гирифтани эм ё ваксина ҷавоб дода шудаанд. Қараев афзуд, вазъи саломатии афроди аз ҳамлаи сагҳо зарардида вазнин нест.
"Рӯзи чоршанбе ҳамаашро як бори дигар аз назар мегузаронем ва ҷавоб медиҳанд. Ҳамааш Иммуноглобулин (муқовимати дарунӣ) гирифтаанд, чун ин кӯдакҳо аз рӯй зарар дидаанд. Аз рӯйи тақвим чӣ тавре, ки муайян шудааст, боқимондаи дорӯро ҳам мегузаронем."
Дар аксҳое, ки корбарон фиристодаанд, чанд кӯдаке дида мешавад, ки бо сару рӯйи хуншору баста дар беморхона қарор доранд.
Ҳодисаи ҳамлаи сагҳои оворагард ба одамон дар минтақаҳои Тоҷикистон ҳар сари чанд вақт мушоҳида мешавад. Чанд сол инҷониб дар кишвар безараргардонӣ ё куштори сагҳои дайду идома дорад.
Масъулон эътироф мекунанд, ки ҷой ва имконияти нигоҳубини сагҳои оворагардро надоранд ва бештар ин ҷонварон қатл мешаванд. Дар гузашта ин амал боиси интиқоди ҷонвардӯстдорон шуда буд. Онҳо гуфта буданд, ки мақомот ба ҷойи нигаҳбонии сагҳо дар макони махсус онҳоро бераҳмона нобуд мекунанд.
Мушоҳидаи Моҳи "хунин" дар Тоҷикистон
Дар осмони Тоҷикистон сокинон шаби 7-уми сентябр Моҳи хунин ё лаҳзаи гирифтани моҳро мушоҳида карданд.
Гирифти Моҳ аз соати 20: 28 оғоз шуда, он ба таври комил тақрибан соати 23 ба вақти Душанбе зери сояи замин рафт. Дар маҷмӯъ ҳодисаи гирифти моҳ ё Хусуф беш аз 5 соат давом кард.
Нуҷумшиносони тоҷик аз пеш эълон карданд, ки шаби 7 ба 8-уми сентябр ҳодисаи гирифти пурраи Моҳ аз Тоҷикистон мушоҳида хоҳад шуд. Барои дидани ин лаҳза дар расадхонаи Ҳисор рӯзи дарҳои боз эълон шуда буд. Шавқмандон дар ин ҷо ҷамъ омада, бо телескопу дастгоҳҳои дигар Моҳро аксбардорӣ ва мушоҳида карданд.
Гирифтани моҳ падидаи ҷолиби кайҳонист ва замоне сурат мегирад, ки Замин аз байни Офтоб ва Моҳ, ҳамсафари зебояш ҳаракат мекунад ва инсонҳо сояи курраи азимеро, ки болояш истодаанд, дар рӯи Моҳ мебинанд. Аз ин ҳодиса "Моҳи хунин" ҳам ном мебаранд.
Мунаҷҷимон мегӯянд, гирифти моҳтоб як ҳодисаи табиӣ аст, ки беш аз 6 ҳазор сол боз мушоҳида мешавад. Ба таъкиди онҳо, дар ин ҳодисаи кайҳонӣ ҳар гуна хосияти бад ҷустан маънӣ надорад.
Сокинони Тоҷикистон соли 2018 ҳам ҳодисаи пурра зери пардаи сиёҳ мондани моҳро мушоҳида карда буданд. Он сол ҳам гурӯҳе аз шавқмандон ва дӯстдорони илми нуҷумшиносӣ дар расадхонаи Ҳисор ҷамъ омада, дарзотарин ҳодисаи гирифти моҳро тамошо карданд.
Видео аз бойгонӣ:
Трамп гуфт, ИМА бо ҲАМОС гуфтугӯ мекунад
Доналд Трамп, президенти Амрико гуфт, ки бо гурӯҳи ҲАМОС (созмони террористӣ дар ИМА ва Иттиҳоди Аврупо) барои раҳоии гаравгонҳои боқимонда дар Ғазза “гуфтугӯи амиқ” анҷом медиҳад.
Ба гуфтаи Трамп, ИМА аз ҲАМОС талаб кардааст, ки фавран гаравгонҳои боқимонда, ки аз рӯзи 7-уми октябри соли 2023 гаравгон ҳастанд, раҳо созад. Президент гуфтааст, ки тибқи иттилои ӯ бархе гаравгонҳо ба наздикӣ ҳалок шудаанд.
Расонаҳо хабар доданд, ки Стив Уиткоф, фиристодаи вижаи ИМА дар умури Ховари Миёна бо мақомоти фаластинӣ дар мавриди оташбас дар Ғазза ва раҳоии гаравгонҳо гап мезанад.
Дар ин гуфтугӯҳо Ҷаред Кушнер, мушовири Қасри Сафед ва домоди Доналд Трамп низ ҳузур дорад.
Наздикони гаравгонҳо аз Доналд Трамп барои талошҳояш сипосгузорӣ кардаанд.
Тибқи иттилои расмӣ, ҳанӯз дар дасти гурӯҳҳои мусаллаҳ дар Ғазза 48 гаравгон боқӣ мондааст. Расонаҳо хабар доданд, ки эҳтимол 26 нафари онҳо кушта шудааст.
Исроил баландошёнаҳои шаҳри Ғаззаро ба хок яксон кард
Артиши Исроил хабар дод, ки баландошёнаҳои шаҳри Ғаззаро мушакборон ва онҳоро пурра нобуд кардааст.
Артиши Исроил иддао дорад, ки баландошёнаҳо аз ҷониби ҲАМОС (Созмони террористӣ дар Аврупо ва Амрико) зидди сарбозони исроилӣ истифода мешуданд.
Ба гуфтаи ин ниҳод, зери баландошёнаҳо пойгоҳи ҲАМОС буда, онҷо силоҳу дигар муҳимот ҷангӣ захира карда буданд.
ҲАМОС чунин иддаои Исроилро борҳо рад кардааст.
Артиши Исроил пеш аз ҳамла ба сокинони биноҳо ҳушдор дода буд, ки онро тарк кунанд.
Расонаҳои маҳаллӣ навиштанд, ки ин биноҳо дар ҳамлаҳои ҷудогона пештар нимавайрона шуда буданд, вале ҳоло ба хок яксон шудаанд.
Мақомоти фаластинӣ мегӯянд, дар ҳамлаи рӯзи ахири Исроил даҳҳо зану кӯдак ва сокинони одӣ кушта шудаанд.
Шаҳри Ғазза, дар борикаи Ғазза охирин маконе буд, ки Исроил биноҳои баландошёнаи онро тахриб накарда буд.
Ин шаҳр, яке аз охирин паноҳгоҳи даҳҳо ҳазор мардуми овораи фаластинӣ буд, ки рӯзи 7-уми август атиши Исроил вориди он шуд. Созмони Миллали Муттаҳид ҳамлаи Исроил ба ин шаҳрро “фоҷеабор” номид ва аз ин кишвар хоста буд, ки ин корро накунад. Ин Созмон дар баёнияе гуфта буд, ки сокинони Ғазза имкони фирор ва ба ҷои дигар кӯчиданро надоранд ва ҳамла ба ин шаҳр қурбониёнро бештар хоҳад кард.
Исроил пас аз 7-уми октябри соли 2023 ба Ғазза барои нобудии ҲАМОС ҳамла кард. ҲАМОС он рӯз ба Исроил ҳамла карда, беш аз 1200 нафарро кушта ва зиёда аз 200 нафарро гаравгон гирифта буд. Исроил мегӯяд, то тамоми гаравгонҳоро озод накунад ва ҲАМОС-ро нобуд насозад, ҷангро бас намекунад. Созмонҳои байналмилалӣ аз шеваи ҷанги Исроил шадидан танқид мекунанд, ки боиси кушта шудани даҳҳо ҳазор зану кӯдак шудааст.
Дар бисёре аз кишварҳои дунё сокинон ба ин амали Исроил эътироз мекунанд.
Рӯзи 6-уми сентябр пулиси Лондон беш аз 150 нафар эътирозгаронро боздошт кард. Онҳо ҳукумати Бритониёро танқид карданд, ки дар баробари ноадолатиҳои Исроил боз ҳам аз ин кишвар пуштибонӣ мекунад.
Пулис Лондон гуфтааст, эътирозгарон аз созмони “Palestine Action” ҳимоят мекарданд, ки он дар ин кишвар созмони террористӣ дониста мешавад.
Мақомоти ин кишвар эътирозгаронро дар ҳамла ба кормандони пулис айбдор кард.
Мақомоти фаластинӣ мегӯянд, дар ҳамлаҳои Исроил ба Ғазза аз октябри соли 2023 то кунун беш аз 63 ҳазор нафар кушта шудааст, ки аксари онҳо занону кӯдакон ҳастанд.
Исроил роҳҳои кумакрасонӣ ба Ғаззаро низ маҳдуд кардааст. Созмонҳои байналмилалӣ мегӯянд, мардуми Ғазза аз гуруснагӣ ва фақр ранҷ мекашанд.
Пизишкони Ғазза гуфтаанд, 367 нафар аз гуруснагӣ ҳалок шудааст.
Зеленский гуфт, Путин метавонад ба Украина биояд
Владимир Зеленский, президенти Украина гуфт, ки Путин метавонад барои музкирот ба Киев биояд, вале ӯ нияти рафтан ба Маскавро надорад.
Владимир Путин, президенти Русия рӯзи 3-юми сентябр гуфта буд, ки омода аст бо раисҷумҳури Украина мулоқот ва гуфтугӯ кунад, дар сурате, ки ба Маскав биояд, аммо гуфт, ҳанӯз маълум нест, ки оё чунин дидоре арзиш дорад ё не.
Дар посух Зеленский гуфт, дар шароите, ки кишвараш шабонарӯз зери мушакборон қарор дорад, наметавонад ба Маскав биравад.
Президенти Украина дар суҳбат бо телевизиони амрикоии ABC News гуфт, ки Путин бо чунин баҳона танҳо оғози музокирот барои сулҳро ба ақиб меандозад. Ба гуфтаи ӯ, Путин бо Амрико бозӣ мекунад.
Путин дар чанд суҳбаташ бо Доналд Трамп, президенти ИМА гуфта буд, ки омодааст, барои расидан ба сулҳ музокира кунад, вале ба ваъдаҳояш амал накард.
Доналд Трамп рӯзи 2-юми сентяр дар як мусоҳибаи радиоӣ гуфт, "ман аз президент Путин бисёр ноумед шудам”.
Бо гузашти беш аз се сол аз оғози ҷанги Русия алайҳи Украина ва талошҳои зиёд ҳанӯз ҳеч нишонае аз поён ёфтани ин ҷанг дида намешавад.
Гуфтугӯ